Hopp til innhold Hopp til hovedmeny

Hjem

> Felles > Bli inspirert

når er jeg gammel nok

Dette er ei veldig sår bok, men ei bok som likevel er så viktig å lese. 

"Når er jeg gammel nok til å skyte faren min?" er ei diktbok for ungdom, men du les den som ei samanhengande historie, med korte setningar på kvar side og tilhøyrande illustrasjonar. Den handlar om ein gut i ungdomsskulealder. Han bur saman med mor si og far sin og ein eldre bror. Faren er valdeleg både fysisk og psykisk. Mora trekk seg unna og har ikkje styrke til å gjere noko og også broren har gitt opp. Berre denne namnlause hovudpersonen tek opp kampen og ser fram til den dagen han veks seg høgare enn faren.   

Gjennom guten sine tankar og ordvekslingar med foreldra og lærarar kjem den fæle kvardagen hans fram. På skulen er guten "drittsekken" som oppfører seg som han vil både mot lærarar og medelevar og ingen likar han. Faren er hyggeleg på møter. Heilt til ein dag..

Å lese denne boka gjer vondt. 

Boka er nominert til Nordisk Råds barne - og ungdomslitteraturpris, samt U-prisen for 2020.                                                                                                                                                                                                                                                                   

Del på facebook
Kunsten å leggje seg paddeflat

I denne dokumentaren har Are Pilskog i fire år fylgt engasjementet til to karar innan Austefjorden i Volda. Målet deira har vore å tryggje paddene si ferd til og frå Litlevatnet. Det er med livet som innsats  paddene kryssar den nye Kvivsvegen for å kome seg ned til vatnet for å leggje egg. Deretter må dei krysse den tilbake saman med fleire tusen nyklekte froskeungar. Løysinga blei paddetunnellar.

Vi fylgjer Oddvar og Gunnar og deira sin til dels frustrerande kamp for å få vegvesenet og eit heilt lokalsamfunn til å skjøne kor viktig dette er for paddene kring vatnet. Litlevatnet i Austefjorden er nemleg ynglestad for ein av dei største paddebestandane i Europa. Dei møter både motbør og medbør. Fleire synst det heile er latterleg. Mange i lokalsamfunnet likar ikkje tanken på at bygda skal bli kjent som paddebygda.

Samstundes fylgjer vi ei padde si farefulle ferd ned mot vatnet. Det er ein kamp på liv og død. Fyrst må han kapre seg ei hoe, i stor konkurranse med mange andre. Deretter må dei to kome seg velberga ned til Litlevatnet over den sterkt trafikkerte vegen. Vi får sjå fantastiske scener med paddekamp og paddeleik. Vi får ei kjensle av frykt når paddene må krysse vegen, vil dei klare det?

Vi møter og kunstnaren som fekk i oppdrag å lage ei gigantisk paddestatue. Kvar skal den til slutt få lov å stå?

Det er ein fasinerande dokumentar den prisvinnande regissøren Are Pilskog har laga. Vel verdt å sjå. Tillat for alle.

 

Del på facebook
Àslaug Jonsdottir, Kalle Güttler og Rakel Helmsdal.:

Monsterknipe

Monsterknipe

Bøkene om Storemonster og Veslemonster kan anbefalast på det varmaste. Det er ikkje utan grunn at dei har blitt utgitt på fleire språk og har mottatt ei rekkje prisar.

Dei to monstra møter utfordringar som alle ungar, og til dels vaksne kjenner seg att i. Boka "Monsterknipe" kom ut på nynorsk i 2019.

I boka «Monsterknipe» dukkar Raggmonster oppatt. Ho møter du for fyrste gong i boka «Monsterbesøk». Det er ikkje so lett når eit tredje monster dukkar opp i monsterland.

Raggmonster er på besøk hos Veslemonster då Storemonster kjem innom. Han har lagt planar for berre seg og Veslemonster.

Utfordringa dei to vennane står ovanfor er at Raggmonster aldri meir vil gå heim. Ho seier at ho ikkje kan gå heim. Men alle har vel ein heim å gå til?

Dei må finne på noko lurt, og det gjer dei. For etter kvart skjønar dei to at det er synd på Raggmonster. 

Dette er ei bok om å hjelpe ein ven som ikkje har det so greitt. 

Boka høver best for born i alderen 0-5 år.

Del på facebook
Demian Vitanza:

Dette livet eller det neste

Dette livet eller det neste

Då boka "Dette livet eller det neste" kom ut for eit par år sidan fekk den stor merksemd. Den handlar om den unge, norskpakistanske Tariq, som i 2013 reiste frå Noreg til Syria for å kjempe saman med muslimske opprørarar mot det syriske regimet. Boka er gitt ut som ein roman, men byggjer i all hovudsak på intervju forfattaren hadde med Tariq, der han sit fengsla i Noreg med ein åtte års dom på seg. 

Dette er ei gripande bok. Ein føler at ein kjem under huda på Tariq når han blottlegger relasjonar til familie og vener gjennom barndomen sin i Halden og ei periode på kostskole i Pakistan. Tariq fortel om ungdomstida si. Om skulegang og festing og om korleis han tener store pengar på smugling av narkotika over grensa frå Sverige. Mot slutten av tenåra fokuserer han meir og meir på islam og kjenner ei lindring når han byrjar å be. Han skildrar det som at "all faenskapen renn ut".  

Ein får innsyn i korleis det muslimske miljøet, som Tariq byrjar å vanke i som tenåring, tenkjer om det som skjer i Syria og vi følgjer Tariq og bestevennen frå dei fyrste samtalane om å hjelpe sine brødre i Syria, vidare på reisa dit og det dei opplever der, til Tariq kjem skada heime til Noreg og vert satt i varetekt.     

Sjølv om boka er basert på samtalar med Tariq, som ikkje er det verkelege namnet hans, og ein føler at ein får innblikk i dei innerste tankane hans, må ein ha i mente at både forfattar og kjelde i større eller mindre grad har lagt inn fiksjon i framstillinga si. Uansett er dette rystande og lærerik lesing og ein finn lett informasjon om den verkelege Tariq i media.

Del på facebook
Bente Bratlund:

Kidnappa

Kidnappa

- Eg blei kidnappa, kviskrar ho.

- Kidnappa? spør eg.

Oda nikkar. 

- Da eg var lita. Eg hugsar det ikkje.

Men eg veit det no.

 

I boka møter vi Bea og  hennar beste venninne Oda. Oda fortel at ho blei kidnappa som lita, ein løyndom Bea aldri må fortelja til nokon. Bea får det ikkje lett etter dette. Stemmer det verkeleg at foreldra til Oda ikkje er dei rette foreldra hennar?  Ho ynskjer ho kunne dele løyndomen med mor si, men ein må halde det ein har lovt.

Venskapet blir sett på prøve då Bea byrjar å tvile på løyndomen til Oda. Tenk om Oda berre har lurt ho?

 

Forfattaren skriv fyrst om den gleda Bea kjenner ved at hennar venninne Oda deler ein so stor løyndom med ho. Problema dukkar opp når ho byrjar å tvile på sanninga i det Oda fortel. Vi les om vonde kjensler som sinne, sorg og frykt for å misse si aller beste venninne. Tilgir ikkje venner kvarandre når noko blir dumt?

Boka er ein del av Samlagets Leseland og egnar godt for barn som les og begynner å bli uthaldande i lesinga. 

Del på facebook
Ingunn Røyset:

Fiskelykke

Fiskelykke av Ingunn Røyset

I år kom også Ingunn Røyset frå Hareid med ei bok i Leselandserien. Leseland er bøker på nynorsk for born som lærer seg å lese. Denne boka er på nivå fire, som egnar seg for born som les litt lengre tekstar sjølv.

I Fiskelykke skal venene Anna og Jonas aleine ut på moloen for å fiske. Mykje spanande kan hende når ein er på fisketur og tenk på alle dei sortane fisk ein kan få!  Anna trur til og med ho har ein amberjack på kroken. Ein fiskesort dei kjenner til av tida dei søkjer på "giant fish" på You Tube. Anna er den fiskevande og er ikkje redd for å klatre høgt opp på moloen. Jonas går mest og tenkjer på katten sin Kvitpusen, som mora tok med til dyrelegen tidlegare på dagen.

Det er så kjekt at det kjem bornebøker som handlar om fisking. Det er noko dei fleste born kan ha som fritidsaktivitet her i fylket og det er mykje nostalgi for alle aldrar i fiskehistorier.  I boka lærar lesaren om mange fiskesortar og ein får lyst til å komme seg ut å fiske. Det er ei fin og munter historie, men har også har alvoret i seg, då Jonas går og er redd for katten sin som kanskje må avlivast.   

    

Del på facebook
Alf Kjetil Walgermo:

Kjære søster

Kjære søster

Lillesyster Amalie er død og storesyster Eli Anne treng ein stad kor ho kan handtere sorgen og snakke med systra si. Ho begynner å skrive til Amalie på tidslinja hennar på facebook, sjølv om far deira vil at Eli Anne skal slette profilen. Eli Anna skriv kvar dag små tekstar som berre ho sjølv kan lese, om korleis ho har det, kva ho føler, ho skriv om Amalie og bandet hennar, om Erlend og om det uppgjorde dei imellom, det ho så gjerne skulle har retta opp i.

Då eg las boka kunne eg verkelig kjenne på Eli Anne sin sorg og frustasjon. Eg kjende kor vondt ho hadde det og kunne forestille meg følelsen av å sitje igjen med noko ein gjerne skulle ha sagt, men som ein ikkje rakk å seie før det var altfor seint.

Kjære søster er ei fin, lita facebook-bok om sorg og følelsar, om dei to systrene som var bestevenner og om korleis det er å plutselig berre vere ei syster igjen.

Del på facebook
Ida Løkås:

Pappa er et postkort

Pappa er et postkort

Kvart år på bursdagen sin har Una fått eit postkort frå faren der det står «Gratulerer med dagen. Hilsen pappa.» På den sekstande bursdagen kjem det ikkje noko postkort, og Una vert naturlegvis lei seg og byrjar å lure på kvifor, på kva som har skjedd som gjer at far hennar ikkje lenger sender ho kort. På kvelden har ho fest og då treffer ho filmstudenten Leo. Leo vil lage ein dokumentarfilm om Una og den fråverande far hennar, og saman byrjar dei å leite etter nokon dei ikkje veit kven er.

«Pappa er et postkort» er ei lettlest lita bok om sakn og lengsel etter noko ukjend, om ein skodespelarmamma som stadig er på farta og ei mormor som er der, men som ikkje alltid er der likevel. Ei fin bok det går kjapt å lese, for ein kan ikkje unngå å bli nysgjerrig på kvifor Una sin pappa sluttar å sende postkort, på kven han er, og på om ho greier å finne han til slutt. 

Del på facebook
Synne Sun Løes:

Stille, stille, stille

Stille, stille, stille

Tove er 18 år og har ingen andre vener enn far sin. Dei to lever eit ganske stille og roleg liv saman og har ikkje hatt besøk på fleire år. På 18 årsdagen sin fortel faren Tove at han har kreft. Han kjem til å tilbringe mykje tid på sjukehuset framover og Tove bestemmer seg difor for å ta eit friår i frå skulen. Og akkurat i det faren sakte byrjar å forsvinne byrjar det ein ny gut i klassa. Han heiter Julian og ser ut til å ville bli kjend med Tove. Julian blir Toves fyrste ven, - akkurat når ho treng det mest.

Dette er både ei trist og litt morosam historie. Ei historie om einsamheit, angst og venskap. Ei bok mange godt kan kjenne seg igjen i. Ei bok det er lett å lese, med eit språk ein berre flyt seg gjennom. Ein kan verkeleg kjenne Tove sine følelsar i kroppen når ein les, og då veit ein at boka er god. Veldig fint, som alltid, frå Synne Sun Løes.» 

Del på facebook
Gutten i den stripete pyjamasen

Et spesielt vennskap mellom to åtte år gamle gutar får fatale konsekvensar.

Bruno sin far er nazioffiser under annen verdskrig. Han tek med seg familien sin frå herskapshuset deira i Berlin til ein kommandantbolig utanfor ein konsentrasjonsleir, då han skal ta over leiinga av leiren.  På den avsidesliggjande staden dei kjem til har Bruno korkje vener eller mykje å finne på. Han får også streng beskjed om å ikkje gå i bakhagen.  Frå loftsvindauget ser han fleire folk i det fjerne som ser ut til å jobbe på ein gard.  Bruno vert nysgjerrig og byrjar å søke mot staden, der alle til hannar undring går rundt i pyjamasar. Det er høge piggtrådgjerder rundt garden, men Bruno får kontakt med ein jamnaldrande gut innanfor gjerdet.  Guten i den stripete pyjamasen er svolten og fortvila fordi han ikkje kan finne att far sin.  Bruno er ein uskuldig og naiv gut som har levd eit beskytta liv, der han ikkje veit kva som gjeng føre seg i verda rundt han. Han vil gjerne hjelpe guten bak gjerdet og byrjar å smugle med seg mat til han frå kjøkenet heime og vil også gjerne hjelpe han å leite etter faren….

Dette er ein stillferdig og gripande film om jødeutryddinga som eg sterkt anbefalar.

Filmen som er frå 2008 er basert på den bestselgjande barneboka med same namn av den irske forfattaren John Boyne.  Medan filmen har fått aldersgrense 11 år, kan boka gjerne lesast av born yngre enn det.  Både bok og film er pensum på dei fleste ungdomsskular når temaet Holocaust vert teke opp. 

Del på facebook

Åpningstider:

Fra fredag 22. mai:

Mandag 10 - 18

Tirsdag - fredag 10 - 16

Lørdag stengt 

  

Telefon:
71 57 51 00

E-post:
bibliotek@kristiansund.kommune.no 

Vi blir inspirert av